PAG-BAN SA VIOLENT VIDEO GAMES, HINDI SOLUSYON SA SCHOOL VIOLENCE, AYON SA MGA EKSPERTO

 

Iginiit ng mga eksperto na hindi sapat ang pagbabawal sa mga violent video game upang tuluyang mapuksa ang karahasan sa mga paaralan.

Ayon sa kanila, maraming iba pang salik ang maaaring makaimpluwensya sa pagiging marahas ng mga kabataan, kabilang ang bullying, kalagayan ng pamilya, at uri ng komunidad na kanilang kinabibilangan.

Ang pahayag ay kasunod ng ulat ng pulisya na isa sa mga suspek sa nangyaring pamamaril sa Tacloban ay napag-alamang nahilig sa paglalaro ng video game na Gorebox.

Dahil dito, ipinatawag sa Senado ang developer ng nasabing laro upang dumalo sa isang imbestigasyon. Gayunman, tumanggi itong humarap at sa halip ay nagpahayag na ang laro ay hindi inirerekomenda para sa mga menor de edad.

Samantala, patuloy na isinusulong ng ilang mambabatas at ng Department of the Interior and Local Government ang pagbabawal sa mga violent video game bilang bahagi ng mga hakbang upang maiwasan ang karahasan sa mga paaralan.

Sa kabila nito, binibigyang-diin ng mga eksperto na ang pagtugon sa bullying, kalusugang pangkaisipan, at iba pang panlipunang suliranin ay mahalagang bahagi rin ng paglutas sa isyu ng karahasan sa mga kabataan.