OPISYAL NA PNP NA TUMANGGAP NG SUHOL, SIBAK SA PWESTO; MGA BENEPISYO, NA-FORFEIT

 

Nabisto ang isang pulis na tumanggap ng suhol mula sa isang babaeng pasahero na hinarang sa Clark International Airport.

Ayon sa Supreme Court, hinarang ang babaeng pasahero sa paliparan noong 2011 matapos lumampas sa P10,000 cash ang dala nitong pera na hindi pa pinapayagan noon.

Agad naman siyang humingi ng tulong sa nakatalagang pulis upang hindi ma-delay sa kaniyang flight.

Sa halip na legal na solusyon ang ibigay sa kaniya, sinagot lamang siya ng opisyal na, “Kung ano maluwag sa iyo.”

Kung kaya’t nagbigay umano ng P5,000 ang babae para payagang makasakay sa kanyang flight.

Dahil dito, nagsampa siya ng reklamo na nauwi sa dismissal ng pulis dahil sa grave misconduct.

Mas lalo pang pinagtibay ang dismissal National Police Commission, Office of the President at Court of Appeals.

Nang lumabas ang desisyon nitong September 22, sinabi ng SC na walang lugar ang corruption at extortion sa serbisyo publiko.

Bukod sa pagkakasibak, na-forfeit din ang retirement at iba pang benepisyo ng opisyal, maliban sa accrued leave credits. Permanente rin siyang pinagbawalang muling magtrabaho sa gobyerno.