MAG-ASAWANG BIBILI NG SCHOOL SUPPLIES, PINAPUTUKAN NG MILITAR MATAPOS PAGKAMALANG REBELDE

 

Patay ang isang ginang habang sugatan naman ang kanyang mister matapos silang paputukan ng mga sundalo ng Philippine Army 88th Infantry Battalion (88IB) sa Malaybalay City, Bukidnon.

Ayon sa ulat, nagsasagawa ng security operations ang mga militar sa isang liblib na bahagi ng bukid nang makasalubong nila ang mag-asawa. Pinaghinalaan umano ng mga sundalo na armado ang dalawa at posibleng may kaugnayan sa isang rebeldeng grupo.

Sinabi ni Lt. Col. Arnold Bautista na sinubukan ng mga sundalo na i-verify ang pagkakakilanlan ng mag-asawa. Gayunman, ayon sa kanya, mabilis umanong tumakbo ang mga ito, dahilan upang lalo silang mapaghinalaan.

Dagdag pa ni Bautista, inakala rin ng mga sundalo na may dalang .22-caliber rifle ang lalaking biktima at magpapaputok sa kanila, kaya inunahan nila itong barilin.

Dahil sa insidente, agad na nasawi ang babae habang ang kanyang asawa ay nagtamo ng mga sugat at isinugod sa ospital para sa agarang lunas.

Sa isinagawang paunang imbestigasyon, lumalabas na nangangahoy lamang umano ang mag-asawa. Ang kanilang nakalap na kahoy ay balak sana nilang ibenta upang makabili ng school supplies para sa kanilang mga anak.

Kasalukuyan namang nasa kustodiya ng mga awtoridad ang walong sundalong sangkot habang nagpapatuloy ang masusing imbestigasyon sa nangyaring pamamaril.

Tiniyak naman ni Bautista na kung mapatutunayang may paglabag sa umiiral na military protocols, mananagot ang mga responsable.

“We deeply regret what happened and will do everything possible to help the family affected by this tragedy,” ayon kay Bautista.