BULOK NA SISTEMA SA PANGKALUSUGAN, IKINABAHALA NG GABRIELA WOMEN'S PARTY

Nagpahayag ng pagkabahala ang Gabriela Women’s Party kaugnay ng nag-viral na kaso ng isang babae na nagsabing namatay ang kanyang asawa matapos hindi maisagawa ang kinakailangang operasyon para sa brain hematoma dahil sa mataas na gastos.

 

Ayon kay Gabriela Representative Sarah Elago, ipinapakita ng insidente ang mga kakulangan sa sistemang pangkalusugan sa bansa, kabilang ang kakulangan ng pondo para sa mga pampublikong ospital at limitadong access ng mga mamamayan sa serbisyong medikal.

 

Sa viral na Facebook post ni Maria Lourdes Sulit, ibinahagi niyang pumanaw ang kanyang asawang si Marvin matapos hindi nila kayaning tustusan ang operasyong nagkakahalaga umano ng dalawa hanggang apat na milyong piso.

 

Sinabi rin ni Sulit na hindi nabawasan ng benepisyo mula sa PhilHealth ang kanilang mahigit dalawang daang libong pisong bayarin sa ospital dahil wala pang dalawampu't apat na oras na naka-confine ang kanyang asawa bago ito namatay.

 

Nilinaw naman ng PhilHealth na may nakalaang benepisyo para sa mga pasyenteng namamatay kahit hindi umabot sa dalawampu't apat na oras ang pananatili sa ospital.

 

Ayon kay PhilHealth Senior Vice President Israel Paragas, posibleng hindi lamang naiproseso o naipatupad nang maayos ng ospital ang benepisyong maaaring matanggap ng pasyente.

 

Dagdag pa niya, kung naisagawa ang operasyon, maaari sanang makatanggap ng tulong mula sa PhilHealth na aabot sa pitumpu't tatlong libo hanggang isang daan at walong libong piso.

 

Patuloy namang pinag-uusapan ng publiko ang insidente, kasabay ng panawagan para sa mas maayos at mas abot-kayang serbisyong pangkalusugan para sa lahat ng Pilipino.