EXPORT NG UBE PRODUCTS, MAS LALO PANG LUMAGO

 

Planong palawakin ng Department of Trade and Industry (DTI) ang pag-export ng ube kasama ng iba pang produktong agrikultural ng Pilipinas.

Ayon sa ahensya, patuloy na tumataas ang bilang ng Philippine exports para sa mga produktong agrikultural kung saan nangunguna ang niyog na nakapagtala ng 34 porsyentong pagtaas.

Hindi rin nagpapahuli ang saging, pinya, at maging ang ube at kalamansi sa paglago ng exportation.

Batay sa datos ng DTI, umabot sa $3.06 million ang halaga ng exports ng mga produktong gawa sa ube noong 2025. Kabilang sa mga bansang pinapadalhan nito ang United States, United Kingdom, Italy, at ilang bansa sa Middle East.

Sinabi ng DTI na tuloy-tuloy ang paglago ng demand para sa processed ube products tulad ng ube powder, puree, halaya, at flavor extracts.

Mayroon na rin umanong interes ang mga international manufacturers na gamitin ang ube sa paggawa ng ice cream, baked goods, beverages, at iba pang produkto.

Ayon pa sa ahensya, nagbubukas ito ng mas maraming oportunidad para sa exporters na makapasok sa mas mataas na value market segments.

Patuloy din umano nilang tutulungan ang mga MSME at mga magsasaka sa pamamagitan ng pagpapabuti ng quality standards at pagpapalakas ng supply chains upang mas maging kompetitibo ang Philippine ube sa international market.

Kumpiyansa rin ang DTI na lalo pang lalago ngayong taon ang exports ng ube at iba pang produktong Pilipino sa posibleng paglagda ng free trade agreements sa European Union, Chile, at Canada.