MAG-ASAWA SA CALIFORNIA, KINASUHAN NG HUMAN TRAFFICKING AT WAGE THEFT SA TATLONG PILIPINONG CAREGIVERS

 

Itinanggi ng mag-asawang sina Rolando “Bobby” Solancho Corpuz, 57, at Maria Elsabel Sio Corpuz, 41 ang mga paratang laban sa kanila kaugnay ng umano’y human trafficking at wage theft.

 

Ayon sa ulat, inakusahan ang dalawa ng pananamantala sa tatlong Filipino caregivers na umano’y walang sapat na dokumento. Sinasabing ginamit nila ang katayuan ng mga biktima sa immigration upang hindi mabayaran nang tama ang mga ito at pagtrabahuhin nang lampas sa 24 oras kada araw sa mga elder care facility sa North County, California.

 

Lumalabas din sa imbestigasyon na karamihan sa mga caregiver ay mga immigrant na maaaring undocumented, dahilan upang sila ay madaling mapasunod at mapagsamantalahan.

 

Dagdag pa rito, pinagawa umano ang mga biktima ng mga gawaing medikal tulad ng pagbibigay ng gamot at insulin injections sa mga pasyente kahit wala silang sapat na training o certification.

 

Sa kasalukuyan, nagpapatuloy pa ang imbestigasyon sa kaso habang pinaghahandaan ang susunod na pagdinig sa korte.

 

Inaasahan naman na mabibigyan ng sapat na proteksyon at tulong ang mga biktima alinsunod sa mga umiiral na batas laban sa human trafficking.