PAGDEKLARA NG PRICE FREEZE SA MGA PANGUNAHING BILIHIN, MULING IPINANAWAGAN SA GOBYERNO

 

 

Muling nanawagan si Senador Bam Aquino sa pamahalaan na pormal na magdeklara ng price freeze sa lahat ng pangunahing bilihin at essential goods.

 

Ito ay layong makatutulong upang maprotektahan ang publiko laban sa epekto ng patuloy na pagtaas ng presyo ng langis sanhi ng krisis sa Middle East.

 

Nabatid na sa isinagawang pagdinig ng Proactive Response and Oversight for Timely and Effective Crisis Strategy (PROTECT) Committee, kinumpirma ng mga ahensya ng pamahalaan ang naunang pahayag ni Aquino na price monitoring lamang — at hindi price freeze — ang nakapaloob sa Executive Order No. 110 ni Ferdinand Marcos Jr. na nagdedeklara ng state of national energy emergency.

 

Kinuwestiyon ni Aquino ang desisyon na hindi isama ang deklarasyon ng price freeze, at sinabing isa ito sa mga dahilan kung bakit siya nanawagan noon ng pagdedeklara ng state of national emergency.

 

Hindi naman naipaliwanag ng mga undersecretary at assistant secretary ng DEPDev, Department of Energy, at Department of Finance kung bakit hindi nagdeklara ang pamahalaan ng mas malawak na state of emergency na magbibigay-daan sa pagpapatupad ng price freeze sa mga pangunahing bilihin.

 

✍TERESA IGUID