DAGDAG-AYUSA SA 4PS, ISINUSULONG SA KAMARA

 

Pinag-aaralan ngayon ng House of Representatives ang panukalang dagdag na ayuda para sa mga benepisyaryo ng Pantawid Pamilyang Pilipino Program o 4Ps.

 

Ayon kay House Majority Leader at Ilocos Norte Rep. Ferdinand Alexander Marcos, kasalukuyang sinusuri ng House Committee on Appropriations ang kinakailangang pondo para sa mga panukala kaugnay ng programa.

 

Nauna nang inaprubahan ng House Committee on Poverty Alleviation, na pinamumunuan ni dating Pangulo at Pampanga Rep. Gloria Macapagal-Arroyo, ang substitute bill na naglalayong amyendahan ang Republic Act No. 11310 o ang 4Ps Law.

 

Sa ilalim ng panukala, itataas ang buwanang cash grant para sa mga anak ng 4Ps beneficiaries:

• P500 para sa daycare at elementarya (mula P300)

• P700 para sa junior high school (mula P500)

• P900 para sa senior high school (mula P700)

 

Ang cash grants ay ipagkakaloob sa loob ng 10 buwan bawat taon.

 

May karagdagang P400 kada buwan para sa mga batang may kapansanan bilang suporta sa kanilang medikal na pangangailangan.

 

Iminumungkahi rin ang pagtaas ng taunang health grant sa P1,800 mula P750, gayundin ang pagbibigay ng P1,100 Food and Nutrition Cash Grant.

 

Kasama rin sa panukala ang First 1,000 Days (F1KD) cash grant na P400 kada buwan para sa mga batang edad 0 hanggang 2 taong gulang, na itinuturing na kritikal na yugto ng child development.

 

Sa ilalim ng bagong panukala, ang pagrepaso sa cash grants at resulta ng programa ay isasagawa na kada tatlong taon, sa halip na kada anim na taon.

 

Ang substitute bill ay naipasa na sa House Committee on Appropriations upang matiyak ang regular at sapat na pondo para sa mga iminungkahing dagdag na benepisyo.