14-ANYOS NA BABAE, NASAGIP NG MGA AWTORIDAD MULA SA PLANONG CHILD MARRIAGE SA SOUTH COTABATO

 

 

Nasagip ng mga awtoridad ang isang 14-anyos na babae mula sa planong child marriage sa Sitio Datal Bila, Barangay Tudok, T’boli, South Cotabato.

 

Ayon sa Philippine National Police (PNP), nakatanggap sila ng ulat mula sa isang paaralan hinggil sa isang menor de edad na sapilitang pinadalo sa isang pamamanhikan kasama ang isang 19-anyos na lalaki.

 

Agad na rumesponde ang mga awtoridad at nailigtas ang menor de edad. Ipinaliwanag ng PNP na mahigpit na ipinagbabawal ang child marriage sa ilalim ng Republic Act 11596.

 

Isinailalim naman ang biktima sa pangangalaga ng Municipal Social Welfare and Development Office para sa psychological support at iba pang intervention services.

 

Ayon kay PNP Chief Gen. Jose Melencio C. Nartatez Jr., patunay ang operasyon ng mahigpit na pagpapatupad ng batas upang maprotektahan ang mga menor de edad.