RHIAN RAMOS AT MICHELLE DEE, INIREREKLAMO NG UMANO'Y PAMBUBOGBOG AT ILLEGAL DETENTION

 

Inirereklamo ng 40-anyos na driver sina Michelle Dee at Rhian Ramos dahil sa umano’y pambubogbog at illegal detention.

Ayon kay Bonifacio Baro, driver at personal assistant ni Rhian, personal siyang tumungo sa tanggapan ng National Bureau of Investigation (NBI) upang magsumite ng kaniyang reklamo laban sa dalawang aktres.

Idinawit din ni Baro ang dating beauty queen na si Samantha Panlilio.

Noong Enero 17, kinulong umano si Baro sa condominium unit nina Rhian at Michelle ng tatlong araw.

Nagtangka itong tumakas ngunit nakita siya ng officer-in-charge ng condominium building at ng bodyguards.

Dinala raw si Baro sa Makati Police, at dito siya sinampahan ni Michelle ng reklamong qualified theft.

Pero ibinasura ito ng Makati City Prosecutor’s Office makalipas lamang ang tatlong araw kaya nakalaya si Baro noong Enero 22.

Ayon naman kay VACC President Boy Evangelista, nasa apat hanggang lima umano ang sangkot sa insidente kung saan tatlo rito ang aktres na sina Rhian at Michelle, at ang dating beauty queen na si Samantha.

Sa isang panayam, sinabi ni Baro na inakusahan siyang nagnakaw ng mga pribadong larawan ng aktres dahilan na binugbog siya ngunit mariin niya itong itinanggi.

Hindi naman ipinaalam ni Baro kung sino sa dalawang aktres ang tinutukoy nito.

Dagdag pa rito, isinalaysay naman ni Baro ang mga ginawa sa kaniya kung saan pinarusahan ito, hinubaran, at binuhusan pa ng alcohol.

Nasaksihan din mismo ng dalawang bodyguards ni Rhian ang pananakit sa kaniya.

Samantala, itinanggi naman ng kampo nina Rhian at Michelle na may nangyaring illegal detention dahil nangyari umano ang insidente sa condo unit na tinutuluyan ni Baro bilang driver ni Rhian.