NETIZEN, ITINURING NA "HORROR EXPERIENCE" ANG VAN TRIP NITO PATUNGONG EL NIDO, PALAWAN

 

Maituturing na isang “horror experience” ang naging byahe ng isang netizen patungong El Nido, Palawan.

Sa isang post ni Nini Jess, ibinahagi niya ang kaniyang karanasan at pagkabahala sa naging byahe nito sa El Nido, Palawan.

Aniya, simula pa lang ay dismayado na ito ng halos dalawang oras siya naghintay sa pag-alis ng van. Sa halip kasi na alas-5:00 ng hapon ang byahe nito ay bandang alas-7:00 ng gabi na ito nakaalis.

Dagdag pa rito, tila kumulang sa espasyo ang naturang van dahil sa itinali na sa harap ng sasakyan ang mga bagahe ng ilang pasahero.

Makalipas ang humigit-kumulang 15 minutong biyahe, napansin na umano ang sobrang bilis at delikadong pagmamaneho ng driver nito.

Sinubukan naman ng ilang pasahero na paalalahanan ang drayber na bagalan ang pagmamaneho ngunit hindi naman ito sinunod.

Dahil dito, maraming mga pasahero ang nangangamba at natatakot sa bilis ng pagmamaneho ng drayber.

Mas naging mapanganib pa ang ikalawang bahagi ng byahe bunsod ng makapal na hamog.

Pero tila hindi ito inalintana ng drayber at patuloy pa rin sa pagmamaneho ng mabilis.

Bagama’t nakarating sila ng ligtas sa El Nido, sinabi ni Nini Jess na hindi siya natutuwa sa kaniyang naging byahe.

Samantala, wala pang pahayag ang driver at travel company sa naturang insidente.