MENOR DE EDAD NA BABAENG ESTUDYANTE, INABUSO AT PILIT PINAKAIN NG IPIS NG GURO

 

Arestado ang isang lalaking guro matapos umano nitong pinilit na pakainin ng ipis ang isang estudyante sa loob ng eskwelahan sa Tondo, Manila.

Ayon sa ulat, sinilbihan ng arrest warrant ang isang 52-anyos na public school teacher dahil sa reklamong pang-aabuso at pagpilit sa 12-anyos na babaeng estudyante na kumain ng ipis.

Sinasabing nangyari ang insidente noon pang October 15 kung saan nasaksihan ng biktima ang pagmomolestya ng naturang guro sa isa pang babaeng estudyante sa loob ng CR ng paaralan.

Dahil sa takot, mabilis na tumakbo papalayo ang saksi upang i-report ang insidente ngunit nahabol siya ng nasabing guro at dinala pabalik sa CR.

Dito na umano sinaktan ng guro ang estudyante at pilit pinakain ng ipis.

Pinagbantaan din siya ng guro kung sakaling malaman ng iba ang insidente.

Nagdulot naman ng takot at pagkabahala sa biktima ang karanasan hanggang sa napagdesisyunan nitong isumbong ang insidente sa kaniyang mga magulang.

Sinampahan ng kasong Special Protection of Children Against Abuse, Exploitation and Discrimination Act ang guro at napasama sa listahan ng three most wanted ng Delpan Police Station.

Pansamantalang kinulong ang guro subalit nakalaya din kalaunan ng magbayad ng pyansang aabot sa P120,000.

Samantala, iniimbestigahan na ng mga awtoridad ang school administration sa posibleng kapabayaan. Kapag napatunayan ay tuluyan nang aalisin ang lisensya ng nasabing guro at hindi na muling makakapagturo pa.