LIDER NG DAWLAH ISLAMIYAH-HASSAN GROUP (DI-HG) AT BOMB EXPERT, PATAY SA ENGKWENTRO

 

Patay ang isang high-ranking leader at bomb expert na si Dawlah Islamiyah-Hassan Group (DI-HG) sa isang operasyon ng mga militar sa Barangay Satan, Shariff AGuak, Maguindanao del Sur nitong Linggo, December 7.

Ayon kay 601st Infantry Brigade commander, Brigadier General Edgar Catu, nakilala ang namatay na terorista na si Ustads Mohammad Usman Solaiman at ang kapatid ng pumanaw na teroristang si Ustadz Kamaro Usman, isang miyembro ng DI-HG na namatay noong Marso 2020.

Si Solaiman ay kilalang expert sa paggawa ng bomba at siya rin ang pamangkin ng isa pang kilalang terorista na umano’y gumagawa ng mga bomba para sa Special Operations Group of the Bangsamoro Islamic Freedom Fighters (BIFF) na nauugnay sa Abu Sayyaf at mga grupo ng Jemaah Islamiya.

Dagdag pa rito, ang grupo rin ni Solaiman ang siyang responsable sa ilang terror attacks sa Mindanao kabilang na ang pagpapasabog sa mga bus sa Parang, Maguindanao noong April 2022, twin bus bombings sa Koronadal City at Tacurong City noong May 26, 2022; at isa pang bus attack sa Barangay New Isabela, Tacurong City noong November 6, 2022.

Dahil dito, patuloy ang isinasagawang hakbang ng mga awtoridad upang masugpo ang iba pang miyembro ng mga terorista.