CAMERAMAN NG NEWS5, HINANGAAN MATAPOS SUMABAK SA ON-THE-SPOT REPORTING SA GITNA NG BAGYO

 

 

Umani ng papuri mula sa mga netizens ang isang cameraman ng News5 na si Ortiz, matapos niyang ipakita ang tapang at dedikasyon sa gitna ng paghagupit ng Bagyong Uwan sa Albay.

 

Si Ortiz, na karaniwang nasa likod ng kamera at walang karanasan sa pagre-report, ay biglang naharap sa isang hindi inaasahang sitwasyon nang siya ay italagang mag-live report mula sa Legazpi, Albay.

 

Habang hawak ang pulang mikropono ng News5, nagsimula siyang mag-ulat nang may halatang kaba. Sa tulong ng beteranong mamamahayag na si Ed Lingao, na nagbigay sa kanya ng payong “Kuwento mo, para lang tayong nag-iinuman,” matagumpay niyang nairaos ang kanyang unang live report.

 

Bagama’t kapansin-pansin ang tensyon sa kanyang boses, umani pa rin ng paghanga si Ortiz mula sa mga manonood dahil sa kanyang sinseridad at determinasyon na maiparating ang sitwasyon ng mga taga-Albay sa gitna ng matinding ulan at hangin.

 

“Ramdam ko ang kaba ni bok, pero saludo!” komento ng isang viewer.

“Kudos to this cameraman, very informative and detailed delivery of news. Not bad for a first-timer!” ayon naman sa isa pa.

“Cameraman??? Pinag-on-the-spot reporting??? First time??? Astig!” dagdag ng isang netizen.

 

Sa kabila ng pagiging baguhan sa harap ng kamera, napatunayan ni Ortiz na ang tunay na diwa ng pamamahayag ay ang katapatan at tapang sa paghahatid ng balita—lalo na sa oras ng sakuna.