ACROBAT, PATAY MATAPOS MAHULOG SA GITNA NG CIRCUS PERFORMANCE SA GERMANY

Patay ang 27-anyos na acrobat na si Marina Barcelo matapos mahulog sa gitna ng kaniyang performance sa isang "Circus Paul Busch" sa Bautzen, Germany.

Ayon sa ulat, nahulog si Barcelo mula sa trapeze swing na nakasabit sa taas na limang metro sa ilalim ng circus dome.

Personal naman itong nasaksihan ng mahigit 80 katao kabilang na ang mga bata.

Agad na nagtangkang sumaklolo ang mga manonood ngunit hindi na naisalba ang buhay ng acrobat. Kinumpirma ng mga awtoridad na hindi siya gumamit ng safety rope habang nagtatanghal.

Pahayag naman ni Ralf Huppertz, CEO ng Association of German Circus Companies, posibleng nakaramdam ng pagkahilo si Barcelo sa kasagsagan ng kaniyang performance.

"It's unusual for a well-trained artist like Marina to not survive a fall from just five meters," ani Huppertz, na nagsabing maaaring may iniinda rin itong karamdaman.

Sa ngayon ay patuloy ang imbestigasyon at pansamantalang isinara ang naturang circus.