70-ANYOS NA OBISPO, PERSONAL NA TUMUNGO SA CULION ISLAND, PALAWAN PARA SA KANIYANG PASTORAL VISIT

 

Matapang na hinarap ng isang 70-anyos na obispo ang mabato at binabahang daan sa Palawan upang makarating sa Culion Island para sa kaniyang pastoral visit.

Ayon kay Apostolic Vicar Broderick Pabillo ng Taytay, Palawan, mahalaga ang presensya ng isang obispo upang mapatatag ang pananampalataya ng mga Pilipino, lalo na yaong mga nasa malalayong komunidad.

Sa kanilang paglalakbay, napasabak sila sa lakaran dahil sa pagbaha ng ilang daanan patungo sa lugar.

Pagdating nila sa Culion, masayang sinalubong ng mga residente ang kanilang obispo.

Ibinahagi rin ni Pabillo na kadalasan, ang pastoral visit ng obispo ay isinasagawa lamang sa mga parokya, habang ang mga pari naman ang bumibisita sa mga chapel na sakop ng mga ito.

Gayunpaman, layunin umano ni Pabillo na mapuntahan ang lahat ng mga chapel sa ilalim ng Apostolic Vicariate of Taytay kahit isang beses kada dalawang taon.