"ZERO BALANCE BILLING" NG DOH, HINDI SAKOP ANG MGA TRAFFIC VIOLATORS

 

Nilinaw ng Department of Health (DOH) na hindi sakop sa “Zero Balance Billing” ang medical services ng mga pasyenteng lumabag sa trapiko.

Ayon kay Health Secretary Ted Herbosa, diskwalipikado na sa “Zero Balance Billing” ng DOH kapag ang pasyente ay na-admit dahil sa hindi ito nakapagsuot ng helmet, seatbelt o dahil sa ito’y nakainom ng nakakalasing na inumin.

Gayunpaman, sinabi ni Health Spokesperson Albert Domingo na ang “Zero Balance Billing” ay para sa lahat ngunit hindi pa ipinapatupad ang serbisyong nararapat sa mga pasyenteng na-admit dahil sa paglabag sa batas-trapiko.

Sa halip, iminungkahi ni Domingo ang pag-adopt ng sistema na ginagawa sa ilang bansa sa western, tulad ng pagpapataw ng mas mataas na insurance premiums sa mga lumalabag sa batas-trapiko.

Ipinaliwanag pa ni Domingo na sa pamamagitan nito ay maaaring magsilbi itong deterrent o panakot upang mabawasan ang paglabag ng mga motorista.

Makakatulong din aniya ang ganitong polisiya hindi lamang para disiplinahin ang mga motorista kundi para bawasan ang insidente ng aksidente sa kalsada, na nagdudulot ng pinsala at pagkawala ng buhay taon-taon.