SANGGOL, NAMATAY AT NABUHAY MULI AT TULUYANG PUMANAW SA DAVAO CITY

 

Nakakalungkot na trahedya ang sinapit ng isang mag-anak sa Davao City matapos na mamatay ang bagong panganak at muling nabuhay hanggang sa tuluyan na itong binawian ng buhay.

Sa report, isang pambihirang sakit ang naranasan ng isang newborn baby magmula nang ito’y isinilang noong Agosto 23, 2025.

Ipinanganak na premature ang sanggol sa isang pribadong ospital at tsaka inilipat sa Southern Philippines Medical Center (SPMC) sa Davao City.

Ngunit, idineklara itong patay dahilan na iniuwi ang bangkay ng bata na nakabalot at nakalagay sa loob ng isang cardboard box.

Pagdating sa kanilang bahay, nadiskubre ng pamilya na humihinga pa ang bata nang buksan ang box.

Sa naturang pangyayari, nakaramdam ng tuwa at pag-asa ang pamilya kaya naman isinugod nila ito pabalik sa SPMC. Agad na inilagay ang bata sa incubator at nagtagal ng dalawang araw bago ito tuluyang pumanaw noong Agosto 25.

Kinuwestyon at dismayado ang pamilya sa insidente kung saan sinisi nito ang medical staff na tila hindi nabigyan ng atensyon ang bata. Anila pa, hindi masyadong nalinisan ang bata nang iabot sa kanila.

Ngunit, ipinaliwanag ni SPMC Medical Center Chief Dr. Ricardo Audan ang posibleng dahilan sa pagkamatay ng bata. Kung saan, nagkaroon ito ng “Lazarus Syndrome” na mas kilala sa tawag na autoresuscitation matapos ang bigong cardiopulmonary resuscitation (CPR).

Samantala, handa namang sumagot ang ospital sa anumang paglilinaw at suporta ng pamilya.