"CRIMINALS, NOT PROTESTERS" - MALACAÑANG SA MGA NANGGULO SA RALLY

 

 

Kinondena ng Malacañang ang nangyaring karahasan sa “anti-corruption rally” nitong Linggo, Setyembre 21, sa Maynila kung saan tinawag na “criminals” ang mga nang-hijack sa dapat sanang mapayapang pagtitipon.

Kung kaya’t inatasan ni Pangulong Ferdinand Marcos Jr. si DILG Secretary Jonvic Remulla na sugpuin ang marahas na aksyon ng mga raliyista at ipahuli ang mga nanggulo sa labas ng Malacañang complex.

Ayon kay Palace Press Officer Claire Castro sa isang panayam, ang mga nasa likod ng gulo ay “not protesters, but outlaws.”

Sa kabila ng pagpapatupad ng mahigpit na maximum tolerance ng pulisya, nauwi pa rin sa kaguluhan ang aktibidad.

Nakita din sa lugar ang mga nakamaskarang indibidwal na nakaitim, na nagtulak at nanuntok sa mga pulis, bago maghagis ng bato at magsunog ng gulong sa Ayala Bridge.

Dahil dito, nasugatan ang isang mamamahayag at si Renato Reyes Jr., pangulo ng Bagong Alyansang Makabayan (Bayan). Umabot din sa 30 pulis ang nagtamo ng sugat. Lumabas sa ulat na may mga menor de edad na kasama sa marahas na grupo ngunit hindi sila kaanib ng Bayan.