PUSA SA BUKIDNON, TINAMAAN NG HOLEN SA MUKHA

 

Kasalukuyan nang nagpapagaling ang isang pusa sa Bukidnon matapos ang halos dalawang linggong pagtitiis sa nakabaong holen sa mukha nito.

Sa report, tinamaan umano ng isang marble toy gun ang 3-anyos na pusa sa Brgy. Sinuda, Kitaotao noong Hulyo 28.

Inakala ng may-ari ng pusa na ito’y minor injury lamang ngunit ikinabahala nito nang madalas na itong mabahing, nahihirapan huminga, at nagpapakita ng mga senyales ng panghihina.

Nang mapansin ang butas sa sugat ng pusa ay dito din nakita na may nakabaon palang holen kaya agad itong isinugod sa Veterinary Hospital.

Sa pagsusuri ng beterinaryo, nakumpirma nito na mayroong nakabaong bilog na bagay malapit sa ilong ng pusa. Dagdag pa rito, may nakaambang panganib sa utak, ilong at mata ng pusa kung sakaling kunin ang naturang bagay.

Nadiskubre din ng beterinaryo ang isang skull fracture sa pusa.

Ngunit, sa kabila nito ay matagumpay itong nakuha ng doktor at ngayon ay nagpapagaling na mula sa post-surgery ang pusa, bagaman humihinga pa rin sa pamamagitan ng bibig nito.

Samantala, nakilala na ng may-ari ang mga indibidwal na may-ari ng marble at plano nitong magsampa ng cruel charges laban sa kanila.