LASING NA PULIS, NANAKIT NG ISANG FOREIGNER SA BOHOL

 

Nahaharap sa posibleng kasong administratibo ang isang pulis sa probinsya ng Bohol matapos nitong bantaan at sinaktan ang isang foreigner nitong Lunes.

Nakilala ang pulis na si Police Corporal Marcelo Olaer, o mas kilala bilang “Siloy at nadiskubreng nakainom nang ito’y manakit ng dayuhan.

Sa isang post ng American national na si Kenny Foster, sinabi nito na habang siya ay nasa labas ng tindahan ay inutusan siya ng naturang pulis na mag-pull over.

Nang gagawin na nito ang utos ay bigla nalang umano siyang tinulak ng pulis at agad na bumunot ng baril.

Nagsimula na din umano itong magsisigaw at maging ang mga nakasaksi sa pangyayari ay nakaramdam ng takot sa posibilidad na ito ay mauwi sa pamamaril.

Kaugnay nito, hindi pa nakuntento ang pulis ay pinagsisipa nito ang motorsiklo ni Foster at nagbanta pang sasaktan ang asawa habang buhat-buhat ang kanilang 5-buwang taong gulang na anak.

Sinubukang protektahan ni Foster ang asawa ngunit bigla nalang umano siyang sinuntok ng pulis sa tagiliran dahilan na nagtamo ito ng sugat sa kaniyang tadyang.

Tumawag na sa 911 si Foster at naghain ng pormal na reklamo laban kay Police Corporal Marcelo Olaer.

Napag-alaman na hindi ito ang unang beses na may nagreklamo sa naturang pulis kung saan nakasuhan ito dahil sa pagpapaputok ng baril habang nakainom.