GURO, NAWALAN NG TRABAHO DAHIL SA PART-TIME JOB SA CONVENIENCE STORE

 

Sinibak sa trabaho ang isang guro sa Japan matapos itong mahuling nagtatrabaho sa isang convenience store.

Ayon sa report, isang lalaking guro na 60-anyos ay nagtuturo sa isang middle school sa Okayama Perfecture sa Japan. Siya ay ini-report sa Okayama City Board of Education matapos mamataang nagtatrabaho sa isang convenience store sa Kurashiki.

Kinumpirma naman ito mismo ng punong-guro ng paaralang kaniyang tinuturuan.

Nilinaw naman ng report na hindi naman ipinagliban ng guro ang kaniyang klase upang magtrabaho sa naturang store. Kundi, ginagawa lamang ito ng guro sa oras ng kaniyang day off.

Gayunpaman, ang naturang akto ng guro ay isang paglabag sa employment contracts sa Japan kung saan ipinagbabawal ang mga side jobs sa kadahilanang nais ng mga employer na ibuhos ng mga empleyado ang kanilang atensyon sa iisang trabaho.

Inamin naman ng guro na mayroon itong side job na nagsimula pa noong 2023 sa pagnanais na madagdagan ang kita nito.

Dahil dito, maraming netizens ang kinwestyon sa patakaran ng pagbabawal sa side job, lalo na kapag ito ay isang marangal na trabaho at ginagawa sa labas ng mga oras ng pangunahing trabaho.