DRIVER NG MOTOR AT ANGKAS NITO, PATAY MATAPOS ARARUHIN NG TRUCK

 

Patay ang driver at ang babaeng angkas nito matapos mabangga ng truck sa Cebu City nitong Biyernes.

Sa inisyal na imbestigasyon, parehong tinahak ng truck at ng motorsiklo ang direksyong pa-timog nang biglang tumawid ang motorsiklo papunta sa middle lane.

Dahil sa mabilis na takbo ng trailer truck ay bumangga ito sa motorsiklo at tumilapon ang driver ng motor at ang angkas nito. Lalo pang napuruhan ang dalawa nang masagasaan sila ng gulong ng naturang truck.

Ayon naman sa mga driver sa lugar, binusinahan nila ang biktima na huwag pumagitna at dumaan lamang sa outer lane, ngunit lumipat ito sa kaliwang bahagi ng kalsada kung saan nabangga ito ng trailer truck.

Halos hindi naman mamukhaan pa ang mga biktima dahil sa pag-araro sa kanila ng truck.

Napag-alaman na ihahatid lang sana ng driver ng motor ang babaeng angkas nito sa trabaho sa isang mall sa SRP nang mangyari ang insidente.

Sa ngayon ay nasa kustodiya ng Traffic Enforcement Unit (TEU) custodial facility ang driver ng truck at nahaharap sa kasong kasong Reckless Imprudence Resulting in Double Homicide at Damage to Property.