CARGO VESSEL SA RED SEA, INATAKE; 2 SUGATAN, 2 NAWAWALA

 

Inatake ng mga armadong indibidwal ang isang cargo vessel na naglalayag sa Red Sea nitong Lunes.

Ayon sa maritime authorities at sa ship manager, Cosmoship Management, ang naturang barko ay isang bulk carrier na pinamamahalaan ng isang kumpanyang Griyego at may bandilang Liberia—ang Eternity C.

Sakay ng nasabing barko ang nasa 22 crew members kung saan 21 rito ang mga Pilipino.

Nangyari ang pag-atake sa 50 nautical miles southwest ng port ng Hodeidah kung saan gumamit ang mga salarin ng sea drones at apat na mabibilis na bangka.

Sakay ng nasabing mga bangka ang mga armadong indibidwal at naglunsad ng humigit-kumulang apat na rocket-propelled grenades na tumama sa tulay ng barko at nasira ang sistema ng komunikasyon.

Bagama’t mayroong sakay na tatlong armadong guwardiya ang nasabing barko nang mangyari ang insidente, ngunit hindi nito napigilan ang malawakang pinsala.

Mula sa nangyaring pag-atake ay dalawang tripulante ang naiulat na sugatan habang dalawa ang nawawala.

Nangyari ang naturang insidente kasunod ng pag-ako ng Houthi rebels na may kinalaman ito sa pananabotahe sa isang Greek-owned Magic Seas na umano’y lumubog na.

Gayunpaman, hindi pa ito napapatunayan pero ligtas namang nakarating sa Djibouti ang lahat ng 19 na Filipino crew members at ang isang armadong guwardiya.

Samantala, paalala naman sa mga Pilipino seafarers na ibayong pag-iingat sa pagdaan sa Red Sea, sumunod sa mga direktiba ng kanilang shipmasters at security officers.