BATANG DOKTOR, HINANGAAN SA INAALOK NITONG MABABANG CONSULTATION FEE

 

Umani ng positibong reaksyon mula sa netizens ang batang doktor sa Taguig City dahil sa abot-kayang konsultasyon nito sa isang komunidad kung saan mahirap i-access ang medical care.

Si Dr. Russel Nacog-ang Guadilla, isang bagong lisensyadong physician ay sumisingil lamang ng P350 sa bawat konsultasyon at P300 para sa mga persons with disabilities (PWDs), estudyante, at senior citizen sa kanilang klinika sa West Rembo.

Sa kaniyang viral TikTok post, sinabi nitong 27-taon na itong nag-aaral at siya din ang kauna-unahang doktor sa pamilya na lisensyado ngunit walang ipon.

“Hindi ko naman yata ikamamatay magbukas ng clinic ng P350 (P300 sa PWD, student, senior) per consult,” anito.

Ayon kay Guadilla, napansin nitong kulang sa mga clinic ang mga komunidad na nakapaligid sa Bonifacio Global City (BGC), kabilang na ang West Rembo, kung saan ito nakatira.

Bagama’t kakabukas lamang ng barangay health center, hindi pa rin nito kakayanin na ma-accommodate lahat.

“So where do minimum wage earners go when they need doctor but can’t afford hospitals or can’t wait hours in line sa health center?” tanong nito. “I opened a small outpatient clinic not for competition or profit, but to offer a reachable option for our neighbors.”

Sinabi pa ni Guadilla na ang kaniyang inaalok na mababang consultation fee ay hindi lang isang symbolic gesture kundi sumasalamin ito ng kaniyang personal journey at values.

“It makes you feel that being a doctor is not just a job, it’s a calling,” saad ni  Guadilla.