3 KABATAAN, NAGING "ZOMBIE" DAW?

Isinugod sa ospital ang tatlong mga kabataan matapos magkombulsyon dahil sa paninigarilyo ng isang kakaibang substance na tinatawag nilang “tuklaw” sa Brgy. Mandaragat, Puerto Princesa City, Palawan.

Sa viral video, kapansin-pansin ang tatlong kabataan na tila nanginginig at kinokombulsyon sa gilid ng kalsada.

Ikinagulat naman ito ng mga tao na nakatambay sa gilid at may ilan pang nagsabi na, “Naging zombie na yan”.

Ayon sa imbestigasyon, bago pa man ang insidente ay nakita na ang grupo na humihithit ng sigarilyo at pagkatapos ay dito na sumama ang kanilang pakiramdam.

Isinugod naman sa ospital ang tatlong binatilyo para sa agarang gamutan.

Sinabi ng mga awtoridad na ang “tuklaw” ay isang uri ng herbal material na nagmula umano sa bansang Vietnam.

Dahil dito, payo ng pulisya sa publiko na huwag hayaang basta-bastang sumubok ng kung anong materyal ang mga kabataan lalo na’t hindi ito pamilyar.