2 SUGATAN SA PAMAMARIL NG ISANG 71-ANYOS NA LOLO

 

Nauwi sa pamamaril ang road rage sa Tanay nitong Linggo kung saan dalawa ang sugatan.

Nag-umpisa ang insidente nang bigla umanong nag-overtake ang isang kotse sa kanang bahagi ng isang pick-up truck.

Bago ito, nagkagitgitan pa ang dalawang sasakyan kung saan nagpupumilit na mag-overtake ang kotse na minamaneho ng 71-anyos na lolo.

Sa pag-overtake ng kotse, tinamaan nito ang side mirror ng pick-up truck.

Dito na umusbong ang galit sa drayber ng kotse kung kaya’t iniharang nito ang sasakyan sa harap ng pick-up at sinugod ang drayber.

Matapos magtalo ang dalawang drayber, bumalik ang 71-anyos na lolo sa kaniyang kotse at pagbalik sa drayber ng pick up ay armado na ito ng baril.

Makailang ulit itong nagpaputok at binaril pa nito ang pasahero sa passenger side.

Malubha ang tinamong tama ng drayber ng pick up sa iba't ibang parte ng katawan nito habang sa paa naman tinamaan ang lalaking nakaupo sa pasaherong bahagi ng pick up.

Hindi naman tinamaan ang tatlong babae na lulan ng pick up.

Matapos ang pamamaril, tumakas ang suspek ngunit naaresto naman ito at narekober sa kaniya ang isang cal. 40 na baril, mga bala, at dalawang patalim sa loob ng kotse nito.

Nadiskubre rin na expired na ang lisensya ng baril ng suspek na residente ng Taguig City.

Samantala, muling paalala ng mga awtoridad sa mga motorista na pairalin ang pagiging kalmado sa kalsada upang maiwasan ang kaparehong insidente.