13 GIRLFRIENDS NI DUTERTE, SINABIHANG MAGHANAP NG MAYAMANG PARTNER

 

Inabisuhan ni dating pangulong Rodrigo Duterte ang 13 girlfriends nito na humanap na mayamang partner kasunod ng pagkakakulong nito sa The Hague, Netherlands.

Sa isang panayam kay Davao City Rep. Paolo “Pulong” Duterte, inalala nito ang sinabi ng kaniyang ama nang sila ay mag-usap sa loob ng International Criminal Court (ICC) detention facility.

“Sa mga girlfriend o lahat ng common-law wife ko, lahat kasi ng dyowa niya, tawag daw niya common-law wife, 13 sila lahat, maghanap na kayo ng ibang boyfriend. Siguruhin ninyo ‘yung malaki ang credit card,” anito na pahayag ng kaniyang ama.

Kabilang sa mga inabisuhan ang long-time partner ni Duterte na si Honeylet Avanceña kung saan mayroon siyang anak na babae na si Veronica “Kitty” Duterte.

Ayon kay Pulong, si Avanceña at ang dating asawa ni Duterte na si Elizabeth Zimmerman ay kabilang sa iilan na nakadalaw sa dating Pangulo sa detensyon.

Kaugnay nito, si Cagayan de Oro Councilor Joyleen “Girlie” Balaba ay isa rin sa mga usap-usapang naging partner ni Duterte at lumipad patungo sa Netherlands ngunit hindi ito pinapasok dahil sa mga tuntunin na tanging immediate family members ang pinapayagang bumisita sa dating pangulo.

Sa halip, sumali si Balaba sa mga supporter ni Duterte sa labas ng ICC na nagsasagawa ng protesta na palayain ang 80-anyos na dating pangulo.