THAI STUDENT, NAGKASAKIT SA BATO MATAPOS MAG-SQUAT NG 200 BESES BILANG PARUSA NG GURO NITO

 

Nagkaroon ng sakit sa bato ang isang Thai student matapos itong sapilitang ipa-squat ng 200 beses bilang parusa sa pagiging late sa pagpasa ng takdang-aralin.

Maliban sa sakit sa bato ay nakaranas din ang estudyante ng pambihirang muscle condition.

Batay sa isang Facebook post nitong Hunyo 12, inatasan ang naturang estudyante ng guro nito na mag-squat ng 200 beses bilang disciplinary measure.

Ilang araw ang nakalipas, nakaramdam ang estudyante ng matinding pananakit sa binti na tumagal ng ilang araw.

Nagsimula na din siyang magkaroon ng pasa na nangingitim, maging ang kulay ng ihi nito ay itim dahilan na agad siyang nagpakonsulta sa doktor.

Dito, nadiskubre na mayroon siyang ‘rhabdomyolysis’, isang kondisyon kung saan tuluyang bumigay ang mga muscle tissue dahil sa sobrang pisikal na aktibidad o trauma. Kapag namatay ang muscle cells, naglalabas ito ng mga toxins sa daluyan ng dugo na maaaring humantong sa kidney failure. Isa sa mga sintomas nito ay ang maitim na kulay ng ihi.

Dahil sa nangyari, sinuspendi ang guro na sangkot sa insidente habang nagpapatuloy pa ang imbestigasyon.

Patuloy din ang pagpapagaling ng estudyante sa ospital at ipinaalam na ng mga doktor ang naturang kaso upang maging aware ang lahat sa posibleng maidudulot ng sobrang pagpaparusa sa eskwelahan. Gayundin, maiwasan ang kaparehong kaso.

Samantala, kinondena naman ng mga netizens ang ginawa ng guro at hinikayat ang pamilya ng nasabing estudyante na kasuhan ito.