ESTUDYANTE, SUGATAN MATAPOS MABAGSAKAN NG MGA TIPAK NG SEMENTO ANG SASAKYAN NITO

 

Bumagsak ang ilang mga tipak ng semento mula sa NAIA Expressway sa sasakyan ng isang estudyante sa kahabaan ng MIA Road sa Barangay Tambo, Parañaque City nitong Miyerkules.

Sa mga larawan, makikita ang labis na pagkapinsala ng windshield ng naturang sasakyan, maging hood at bubong nito.

Ayon sa mga report, bumagsak ang mga konkretong debris mula sa isang bahagi ng expressway na kumukonekta sa mga support beam nito.

Sugatan naman sa insidente ang isang estudyante na agad nirespondehan at binigyan ng first aid bago dinala sa ospital.

Matatawag namang isolated at rare case ang insidente, ayon sa operator ng expressway.

Habang, tiniyak naman ng kumpanya na nakikipag-ugnayan na ito sa mga lokal na awtoridad at sa pamilya ng biktima para sa kinakailangang tulong nito.

Samantala, nagsagawa naman ng masusing safety inspection ang maintenance team ng operator sa NAIA Expressway (NAIAX) carriageway upang maiwasan ang kaparehong insidente at masiguro ang kaligtasan ng mga motorista.