SKYPE, OFFICIALLY SIGNED OFF

 

Opisyal na nag-signed off ang social media platform na Skype nitong Lunes, May 5.

Kinumpirma ito ng Microsoft na siyang kumuha ng Skype sa halagang $8.5-bilyon noong 2011.

Bago pa man umusbong ang Discord, Zoom, Google Meet, Slack, at Microsoft Teams, ay mayroon nang Skype.

Kung matatandaan, noong 2000s at early 2010, ang Skype ang naging sandalan ng mga tao para sa kanilang job interviews, remote work, tutoring, at maging sa long-distance na tawag.

Sa Pilipinas, hindi lang ito isang app kundi maituturing nila ang Skype bilang “lifeline”.

Ang Skype ang naging unang sandalan ng mga Pilipino noong hindi pa nauuso ang mga smartphones na may mga pang-video call lalung-lalo na ng mga overseas Filipino workers (OFWs).

Naging susi rin ang Skype sa paglalapit ng mga puso ng ilang mga Pinoy noong 2010 kung saan ginagamit nila ito upang tawagan ang kanilang mga dayuhang partner.

Ngunit, dumaan ang pandemya ay tila hindi nagiging epektibo ang Skype dahil sa kinailangan nang i-prioritize ang Teams para sa komunikasyon.

Dito na pumasok ang Zoom at Google Meet para sa mga taong nasa remote work at pagdalo sa mga virtual meetings.

Ang pagsasara ng Skype ay nagmamarka ng pagtatapos ng isang kabanata sa kasaysayan ng digital sa Pilipinas na kumukunekta sa mga pamilya, nagpapanatili ng mga relasyon, at sumusuporta sa mga negosyo.