PEKENG MARRIAGE CERTIFICATE NG PINAY, NABISTO SA IMMIGRATION

 

Hinarang sa airport ang isang Pilipina matapos madiskubreng peke ang ipinakitang marriage certificate sa Bureau of Immigration nitong Sabado.

Ayon sa BI, lilipad sana patungong Nigeria ang Pinay na 33-anyos upang magtrabaho ngunit tila na-scam pala ito.

Nabiktima pala ang Pinay ng illegal recruitment kung saan inamin nitong may alok sa kaniyang trabaho sa Nigeria bilang kasambahay sa sahod na P35,000.

Dagdag pa ng BI, sinabi sa kanila ng 33-anyos na babae na ikinasal siya sa isang Nigerian noong May 2024 ngunit ipinagbabawal sa tradisyon ng nayong kinabibilangan ng asawang Nigerian na ibahagi ang anumang ebidensya ng kanilang kasal.

Dahil dito, hindi pinayagang makalabas ng bansa ang nasabing Pinay at nagpaalala naman si BI commissioner Joel Anthony Viado sa publiko na mag-ingat at maging mapanuri sa anumang job offers sa ibang bansa.