DATING MISS GRAND INTERNATIONAL 2024, ISINIWALAT ANG KARANASAN SA LOOB NG ORGANISASYON

 

Nagsalita na ang dating Miss Grand International 2024 na si Rachel Gupta kasunod ng inilabas na alegasyon ng pageant organization laban sa kaniya.

Sa kaniyang video, naging emosyunal ang beauty queen nang detalyado nitong ipinahayag ang naging karanasan sa organisasyon.

“Constant harassment, mental torture and systemic mistreatment,” pagsisimula ni Gupta sa kaniyang video.

Hindi lubos akalain ni Gupta na pinapayagan ng naturang beauty pageant ang mga bansa na magbayad para sa boto.

Hindi din nito masisisi ang mga bansa na gagawin ang lahat para manalo ang kanilang pambatong kandidata at ibinato ang sisi sa organisasyon sa pagtanggap at pag-set ng ganitong standard.

Kinuwestyon pa ni Gupta ang organisasyon sa kung paano naman ang ibang mga kandidata na hindi kayang magbayad o ang mga bansang walang kakayahan na magbigay ng malaking halaga.

Sa kabila nito, naniniwala si Gupta na ang kaniyang pagkapanalo sa titulo ay bunga ng public support lalo na’t hindi kayang magbayad ng India para bumili ng mga boto.

Ibinunyag pa ng Indian national na siya ay itinira sa hindi maayos na pamumuhay sa Thailand kabilang na ang pagtira sa isang maliit na hotel room na walang pagkain at basic amenities na ibinibigay.

Nakaranas din aniya ito ng body shaming at verbal abuse mula sa mga kinatawan ng organisasyon.

“What am I supposed to say to that, it’s so embarrassing and it makes you feel so small and so bad and I understand obviously I have to stay fit for the job. I have to stay in shape but it’s so difficult when you don’t have access to anything and you’re just locked in a house basically all day long,” sabi ni Gupta.

Ikinuwento pa ni Gupta na isang buwan lang ang kaniyang natanggap na sahod at ang pamilya na nito ang sumasagot sa kaniyang mga gastusin.

Ipinaabot din nito ang kaniyang kaligtasan mula sa organisasyon kaugnay ng kasong kinasangkutan ng dating titleholder na nagreklamo ng sexual harassment ngunit agad namang na-dismissed.

Nanawagan naman ang beauty queen na maging aware at hinimok ang publiko na “think critically about where they place their trust.”

Matatandaang naglabas ng anunsyo si Gupta ukol sa kaniyang pag-resign at pagbitiw sa kaniyang titulo sa isang social media post. Sa kaparehong araw, naglabas din ng opisyal na pahayag ang MGI ukol sa pag-resign ng dating beauty queen at sinabing bigo nitong nagampanan ang mga tungkulin dahilan ng pagkakatanggal sa titulo.