PAGPATAY SA BUNTIS NA BLUE SHARK, KINONDENA NG DA-BFAR

 

Mariing kinondena ng Department of Agriculture-Bureau of Fisheries and Aquatic Resources (DA-BFAR) ang pagpatay sa buntis na blue shark na naispatan sa Brgy. Cabayawa, Tubay, Agusan del Norte nitong Martes, Marso 18, 2025.

Batay sa inisyal na imbestigasyon ng BFAR Caraga, ang naturang blue shark ay may haba na 2.76 meters at 0.53 meters na lapad.

Sinasabing napagkamalan ang naturang isda na isang malaking tuna o marlin dahilan na inatake ito ng mga beachgoers at hinuli ang nanghihinang pating na nadiskubreng may kawit sa bibig at mga sugat sa ulo at buntot.

Nagsimula na ding mangitlog ang nasabing pating kung saan nakapaglabas ito ng kabuuang 30 na mga baby shark at 29 rito ay matagumpay na naibalik sa dagat.

Paalala naman ng DA-BFAR Caraga sa publiko na ilegal ang pangingisda, saktan o ibenta ang mga protected shark species at iba pang marine wildlife tulad ng manta rays, dolphins, whales, dugongs, at sea turtles alinsunod sa Philippine Fisheries Code, Republic Act (RA 8550), na amended ng RA 10654.

Sinumang mapatunayan na nanakit o pumatay ng protected shark species o iba pang marine wildlife ay paparusahan ng multang nagkakahalaga ng hanggang P500,000 o aabot pa sa P5-milyon.

Kapag namang mahatulan sa korte, ang akusado ay paparusahan ng twelve (12) years at (1) day hanggang 20 years na pagkakakulong at multang katumbas ng dalawang beses sa administrative fine.

Samantala, hinikayat pa ng ahensya ang LGUs, mga mangingisda, at komunidad malapit sa dalampasigan na irespeto at protektahan ang marine wildlife.