NASA 10 KATAONG SAKAY NG TREN SA PAKISTAN, PINATAY NG SEPARATISTANG MILITANTE

 

Tinatayang na nasa sampung katao ang pinatay ng mga separatistang militante matapos i-hijack ang isang tren sa southwestern province ng Balochistan sa Pakistan.

Ayon kay Imran Hayat, senior railway official, siyam sa mga pinatay ay mga security personnel kabilang na ang drayber ng tren na pinatay din sa nasabing pag-atake.

Ang naturang tren na nakilalang Jaffer Express ay hinarang ng mga armadong indibidwal nang ito’y nakaabot sa isang tunnel. Patungong northwestern city ng Peshawar ang tren na galing sa Quetta sa Balochista, westernmost province ng Pakistan.

Sa pag-atake ng mga militanteng grupo, naging mainit ang pagpapalitan ng putok sa loob ng tren na napag-alamang may sakay na daan-daang mga pasahero.

Dagdag pa rito, ginamit ng mga militante ang mga babae at mga bata bilang panangga sa bakbakan.

Nitong gabi ng Martes ay pinalaya ang nasa 104 na mga hostage ng security forces habang dinala naman sa ospital ang mga sugatang pasahero.

Kaugnay nito, nagpapatuloy pa din sa pag-rescue ang mga awtoridad sa mga natirang hostages sa loob ng tren.

Samantala, inamin ng Baloch Liberation Army (BLA), isang grupo ng mga separatistang militante, na sila ang may kagagawan sa insidente ng pag-atake ng tren at nagpahayag na papatayin nila ang mga hostage kung may mangyayaring security operation.