MAIDEN NAME NG MGA MARRIED WOMEN, MAAARING GAMITIN SA KANILANG PASSPORTS

 

Inanunsyo ng Department of Foreign Affairs-Office of Consular Affairs (DFA-OCA) na maaaring gamitin ng mga babaeng kasado ang kanilang maiden names sa kanilang passport.

Ayon sa ahensya, kinailangan lang magsumite ng mga aplikante ng orihinal at kopya ng Certificate of Live Birth na inisyu ng Philippine Statistics Authority sa DFA-OCA. Gayundin, isusumite din ng mga aplikante sa ahensya ang kanilang orihinal at kopya ng PSA-issued Certificate of Marriage at ang notarized Affidavit of Explanation.

Dapat rin anila isama sa Affidavit of Explanation ang request na ibalik sa maiden name ang passport.

Dagdag pa rito, magsusumite din ang mga aplikante ng pinakabagong naisyu na Philippine passport at anumang valid government-issued ID na nakalagay ang maiden name nito.

Maaari ding ibalik ng married women ang kaniyang maiden name sa passport application o renewal sa bisa ng annulment, declaration of nullity of marriage, legal separation, judicially-recognized foreign divorce o ang pagkamatay ng asawa.

Para sa mga babaeng gustong ibalik ang maiden name sa kanilang passports dahil sa namatay ang asawa, kinailangan nilang magsumite ng original at photocopy ng PSA-issued Certificate of Death ng asawa o ng apostilled o authenticated Foreign Death Certificate na may English translation, kasama ang iba pang mga requirements para sa maiden name reversion nito.

Para naman sa mga aplikanteng married women na nais ibalik ang maiden sa bisa ng annulment, declaration of nullity of marriage, judicially-recognized foreign divorce, judicially-recognized divorce sa ilalim ng Presidential Decree 1083 and legal separation, sinabi ng DFA-OCA na kinailangan nilang magsumite ng original at photocopy ng PSA-issued Certificate of Marriage na may annotation na sumasalamin sa nullity o dissolution of marriage, judicial recognition of foreign divorce or the court decree of legal separation.