ASO, AKSIDENTENG NABARIL ANG AMO

 

Tinawag na “accidental injury” ang sinapit ng isang lalaki sa Memphis, Tennessee matapos itong aksidenteng mabaril ng kaniyang alagang aso.

Ayon sa pulisya, nakahiga sa kama at natutulog ang lalaking amo habang katabi nito ang nobya nang bigla nalang tumalon papunta sa kanila ang alagang pit bull na aso na kinilala kay “Oreo”.

Hindi naman sinasadya ng aso na maapakan at sumabit sa kuko nito ang gatilyo ng baril dahilan na tinamaan ang lalaking amo sa hita.

Mabilis naman siyang dinala sa ospital at nakaligtas sa peligro.

Sinabi naman ng nobya ng lalaking amo na talagang makulit ang asong si Oreo kung saan gustong-gusto aniya nitong magtatatalon-talon.

Dahil dito, nagpaalala ang awtoridad na tiyaking naka-safety o gumamit ng trigger lock sa baril upang maiwasan ang kaparehong pangyayari.