13-ANYOS, PINAKABATANG KASONG TINAMAAN NG HIV SA PALAWAN

 

Nagbabala ang City Health Office (CHO) at Amos Tara Community Center ukol sa mga kaso ng Human Immunodeficiency Virus (HIV) kung saan mas tumataas pa ito at pabata ng pabata ang nagkakaroon nito.

Sa ulat, itinala na pinakabatang nagkaroon ng HIV ang isang 13-anyos sa Palawan sa pamamagitan ng sexual transmission.

Maliban dito, naka-record pa ang CHO ng 17 na mga kaso ng HIV sa mga kabataang may edad ng hanggang 14-anyos sa Palawan.

Isa naman sa pinakabatang nakakuha ng HIV ay ang bagong panganak na sanggol na nakuha nito sa kaniyang ina.

Batay sa datos, ang Puerto Princesa ang may pinakamataas na bilang ng HIV cases sa rehiyon ng MIMAROPA kung saan naka-record ito ng 709 na kaso mula sa kabuuang 1,198 na kaso ng Palawan mula pa noong 1988.

Sa kabila nito, kahit na mayroon nang inaalok na libreng HIV testing ay may mga residente pa ding ayaw magpa-test.

Dahil dito, patuloy na hinikayat ng City Health Office at Amos Tara Community Center ang publiko na magpa-test at sumailalim sa mga proseso aupang maiwasan ang HIV lalo na’t libre ito at mananatiling confidential.