BEAUTY QUEEN CHARLOTTE AUSTIN, NAWALAN NG HALOS P6.8-MILYON

 

Nawalan ng halos 4-milyon baht o katumbas ng P6.8-milyon matapos itong mabiktima ng dalawang kalalakihan na nag-o-operate ng isang AI-assisted scam call center.

Sa isang report ng South China Morning Post, nabiktima si Charlotte Austin, isang Thai-British beauty queen, ng hinihinalang 50-member gang na nag-o-operate sa isang gusali sa Poipet, isang syudad sa northern Cambodia malapit sa border ng Thailand.

Kinilala ang mga suspek na sina Ramil Pantawong, 31-anyos at 28-year-old Thanawut Kanyaphanthe na ngayo’y hawak na ng mga awtoridad.

Ayon kay Austin, nakatanggap siya ng tawag mula sa nagpakilalang miyembro ng Department of Special Investigation at inakusahan siyang sangkot sa money laundering scheme.

Sinabihan pa siya ng mga suspek na mapapawalang-sala lamang umano ito kapag makapagpadala ng 4-milyon baht.

Ginawa naman ng beauty queen ang sinabi ng caller ngunit hindi na naibalik pa ang kaniyang pera.

Pahayag naman ng mga suspek matapos silang maaresto ng mga pulis na sila’y na-recruit sa social media upang maging administrators ng isang gambling website. Ngunit, pagdating sa lugar, kinuha ng isang grupo ang kanilang cellphones at passports tsaka pinilit na magtrabaho sa isang call center scam.

Dagdag pa ng mga suspek, sila’y pinagbantaan na sasaktan kapag hindi ginawa ang utos. Wala din umano silang natatanggap na bayad mula sa mga nabibiktima nila.

Sa kabila nito, sinabi ng pulisya na nasa humigit-kumulang 163 katao ang nabiktima ng naturang scam ng grupo kung saan gumagamit sila ng AI upang ibahin ang kanilang mukha kapag nakikipag-usap sa mga biktima sa pamamagitan ng video calls.