300 NORTH KOREAN SOLDIERS, PATAY SA GYERA NG RUSSIA AT UKRAINE

 

Nasa 300 na mga sundalo ng North Korea ang namatay habang 2,700 ang sugatan sa pakikipagbakbakan sa gyera ng Russia at Ukraine, ayon sa mambabatas ng South Korea.

Kamakailan, sinabi ng Seoul na nagpadala ng mahigit 10,000 mga sundalo si North Korean leader Kim Jong Un bilang “cannon fodder” upang tumulong sa Moscow na lumaban sa Kyiv kapalit ng Russian technical assistance para sa mabibigat na armas ng Pyongyang at satellite programs.

Nito linggo, ipinahayag ni Ukrainian President Volodymyr Zelensky na nakabihag sila ng dalawang sundalong North Korean kasabay ng pagpapalabas ng video ng mga sugatang kasamahan na sumasailalim sa interogasyon.

Mula sa pagkakahuli sa dalawang sundalo ng North Korea, umaasa ang Ukraine sa posibilidad na “prisoner swap” para sa mga nahuling sundalo ng naturang bansa.

Ngunit, ibinahagi ng mambabatas na si Lee Seong-kweun na ang mga sundalo na napag-alamang mula sa elite Storm Corps ng North Korea ay inatasang kitilin ang sarili sa halip na maging bilanggo.

Samantala, sa post ni Zelensky sa X (dating Twitter) na handa itong makipag-negosasyon na ibalik ang sundalo ni Kim Jong Un kapalit ng pagbabalik sa mga sundalo nito.