PAG-IYAK AT PAGSIGAW NG TULONG NG ISANG LALAKI, INAKALANG MULTO NG MGA RESIDENTE

 

Marami ang nagulantang sa nasaksihan sa loob ng abandonadong balon sa isang gubat sa Thailand-Myanmar border.

Inakala ng ilan na baka isang multo ang kanilang narinig ngunit nang kanilang makita ay isa pa lang tao ang na-trap sa loob.

Kinilala ito kay Liu Chuanyi, 22-anyos, at halos tatlong araw na itong nasa ilalim ng balon.

Ayon sa ulat, naririnig ng mga residente ang pagsigaw at pag-iyak nito ngunit tila binalewala ito dahil sa pag-aakalang ito’y multong naninirahan sa gubat.

May ilan namang nag-report sa insidente na agad namang nirespondehan at dito nahanap ang isang lalaki na na-trap sa tuyong balon na may lalim na 12-metro.

Inabot ng 30 minuto bago naiahon ng mga rescuers si Liu.

Hinang-hina ito.

Fractured ang kaliwang kamay niya at may mga putok din sa ulo at mga galos sa buong katawan.

Matapos lapatan ng pangunang lunas ay agad itong dinala sa ospital.

Sa ngayon ay ligtas na sa panganib si Liu.