NEDA BOARD, INAPRUBAHAN ANG FREE TRADE AGREEMENT SA SOUTH KOREA

 

Inaprubahan ng National Economic and Development Authority (NEDA) Board ang pagpapatupad ng free trade agreement sa South Korea at dalawang proyekto ng nangungunang imprasktruktura na nagkakahalaga ng P63.2-bilyon.

Ayon kay NEDA Secretary Arsenio M. Balisacan, layunin ng naturang inisyatibo na palakasin ang produksyon sa agrikultura, palakihin ang regional connectivity, at pasiglahin ang aktibidad ng ekonomiya sa buong bansa.

Sa ilalim ng kasunduan, magbibigay ang Korea ng duty-free entry sa malawakang hanay ng mga produkto ng Pilipinas na nagre-representa sa kabuuang 87.4% ng Korean imports mula sa Pilipinas.

Sa pamamagitan nito, inaasahan na palalalakasin nito ang pag-export ng Pilipinas sa Korea at mas maging matibay ang ugnayang pangkabuhayan ng dalawang bansa.

Dagdag pa rito, inaprubahan din ng NEDA Board ang dalawang proyekto sa imprastraktura na kinabibilangan ng P37.5-bilyon na Ilocos Norte-Ilocos Sur-Abra Irrigation Projects at ang P25.7-bilyon na Accelerated Bridge Construction Projects for Greater Economic Mobility and Calamity Response (ABC Project).

Ang dalawang proyekto ay pinondohan ng Official Development Assistance (OSA) loan mula sa pamahalaan ng France.

Samantala, inaprubahan din ng NEDA Board ang adjustments sa limang nagpapatuloy na proyekto kabilang na ang Value Chain Innovation for Sustainable Transformation in Agrarian Reform Communities (VISTA) project, ang Health System Enhancement to Address and Limit (HEAL) Covid-19 project, at ang Panglao-Tagbilaran City Offshore Bridge Connector (PTCOBC) project.