PINOY NA MANGINGISDA, IBINUNYAG ANG PANGHA-HARASS NG CCG

Inilabas ng Philippine Coast Guard (PCG) ang mga video ng pangha-harass ng China Coast Guard sa mga Pinoy na mangingisda malapit sa Escoda o Sabina Shoal nitong nakaraang buwan.

Sa isang sinulat na affidavit, ibinunyag ng mangingisdang si Arnel Lepalam kung paano sila hinarang ng CCG nang sinubukan nilang lumayag sa shoal sa West Philippine Sea upang manghuli ng isda.

Sinabi ni Lepalam na namataan ng kanilang grupo ang barko ng CCG 26 miles mula sa Escoda Shoal noong Oktubre 9.

Dakong 5:50 ng umaga ay nag-deploy ng dalawang speedboat ang CCG upang gawin ang pangha-harass sa grupo ni Lepalam.

Isang oras ang nakalipas nang tuluyan na silang dinikitan ng dalawang speedboat ng CCG at pinagbawalang makapasok sa Sabina Shoal.

Binangga pa aniya ng naturang speedboat ng CCG ang katig ng sinasakyang bangka nina Lepalam at sapilitang itinaboy papalayo sa Sabina Shoal.

Naranasan din nilang mabusinahan ng malakas mula sa CCG.

Sa nangyaring pangha-harass sa kanila ng CCG ay napagdesisyunan na lang ng grupo ni Lepalamn a lumipat sa Iroquois Reef upang mangisda.

Sa sunod na araw ay kaparehong insidente muli ang kanilang naranasan dahilan na hindi na sila nakakapangisda sa Escoda Shoal.

Takot na din ang namutawi kay Lepalam at sa mga kasama nito kung kaya’t napilitan nalang itong bumalik sa Quezon, Palawan.

Samantala, hinihintay pa ang pahayag ng PCG kaugnay sa insidente.