156 PASAHERO NG RORO, NA-RESCUE

 

Mabilis na na-rescue ng Philippine Coast Guard (PCG) ang nasa 156 na mga pasaherong sakay ng RoRo/passenger vessel na MV Maria Olivia matapos sumadsad sa karagatan habang papaalis ng Romblon.

Kasama ng PCG ang Municipal Disaster Risk Reduction and Management Office (MDRRMO) at ang Provincial Government sa pag-rescue sa mga pasahero.

Lumalabas sa inisyal na imbestigasyon na ang MV Maria Oliva ay ino-operate ng Montenegro Shipping Lines at umalis sa San Agustin Port sakay ang nasa 156 na pasahero, 38 crew members kabilang na ang master ng vessel pati na ang 26 rolling cargos na patungo sana sa Romblon Port.

Ligtas namang naihatid ang mga pasahero sa pantalan ng Romblon maliban sa isang pasyenteng naka-dialysis at kasama nito dahil kinailangan nitong ma-access ang kaniyang dialysis equipment na naroroon sa barko.

Sa kabila nito, nagsagawa ng inisyal na oil spill assessment ang mga tauhan ng PCG at lumabas na negatibo ang result anito.

Sa ngayon ay sinusubaybayan ng CGSS Romblon ang sumadsad na barko habang nagpapatuloy ang imbestigasyon sa dahilan ng insidente.