10-ANYOS NA ANAK, SAPILITANG PINAGBEBENTA NG DROGA NG INA SA NAVOTAS

 

Iniligtas ng mga awtoridad ang isang 10-anyos na bata sa Navotas City matapos umano itong sapilitang pinagbebenta ng kaniyang ina at ng kinakasama nito ng ipinagbabawal na gamot.

Sa pahayag, kwento ng bata na sinasaktan umano ito ng kaniyang magulang kapag hindi nito susundin ang utos nilang magbenta siya ng droga.

Dagdag pa dito, umabot ng halos isang taon ang nasabing kalakaran hanggang sa napagdesisyunan na nitong tumakas at magsumbong sa kaniyang lola.

Dito na humingi ng tulong ang lola sa mga awtoridad.

Agad namang inaresto ang lalaki at kasama nito sa isang buy-bust operation ngunit mariin nitong itinanggi ang mga paratang.

Samantala, sinampahan na ng kasong pagbebenta at pag-iingat ng ilegal na droga ang mga akusado.