DEPED, DOH NAGLUNSAD NG BAKUNA ESKWELA UPANG BUHAYIN ANG SCHOOL-BASED IMMUNIZATION LABAN SA MGA SAKIT

 

Inilunsad ng Department of Education (DepEd) at Department of Health (DOH) ang pagbuhay sa School-Based Immunization program sa pamamagitan ng Bakuna Eskwela upang bigyang-proteksyon ang estudyante mula sa nakakamatay na vaccine-preventable diseases (VPDs).

Pinangunahan ito ni Education Secretary Sonny Angara and Health Secretary Ted Herbosa nitong Lunes sa Dr. A Albert Elementary School sa Manila.

Ipapatupad din ang kampanyang Bakuna Eskwela sa mga piling pampublikong eskwelahan sa iba’t ibang probinsya ngayong Oktubre hanggang Nobyembre 2024, matapos ang apat na taong pagkaantala dahil sa COVID-19 pandemic.

Mula sa pondong P853-milyon, layunin ng Bakuna Eskwela na ma-immunize ang humigit-kumulang 3.8 milyon na public school students na naka-enrol sa Grades 1 at 7 na may MR at Td vaccines.

Gayundin, nasa 973,930 na mga babaeng estudyante sa Grade 4 sa mga piling pampublikong paaralan ang babakunahan ng HPV na mapoprotekta laban sa cervical cancer.