PBBM, NAKATAKDANG MAMAHAGI NG MGA E-TITLES AT AMBULANSYA SA PASSI

Personal na ipapamahagi ngayong araw ng Huwebes, Setyembre 19 ni Pangulong Ferdinand Marcos Jr. ang titulo para sa Agrarian Reform Beneficiaries (ARBs).

Ito’y kasabay sa pagbisita ng pangulo sa Passi City, Iloilo ngayong araw kung saan layunin nitong suportahan ang lokal na komunidad at ang mga benepisyaryo ng agrarian reform.

Kabuuang 2,588 e-titles ang ipapamahagi na sumasaklaw sa lupain na 2,643 ektarya sa buong isla.

Ayon kay DAR undersecretary Jesry Palmares, kinailangang ingatan ng mga benepisyaryo ang kanilang e-titles lalo na’t ito ang magsisilbing pruweba ng land ownership na posibleng maipapasa sa mga susunod na henerasyon. 

Maliban dito, personal ding itu-turnover ni PBBM ang nasa 52 patient transport vehicles (PTVs) sa iba’t ibang local government units (LGUs).

Samantala, papangunahan naman ang naturang aktibidad ng Philippine Charity Sweepstakes Office (PCSO) habang ang pag-turnover ng mga PTV ay gagawin sa Plaza Paloma.