200 ELEPANTE, PLANONG KATAYIN SA ZIMBABWE BILANG SAGOT SA EL NIÑO PHENOMENON

 

Planong kumatay ng nasa 200 na mga elepante sa Zimbabwe bilang pantanggal-gutom sa mga komunidad sa naturang bansa.

Ito’y matapos maranasan ang matinding epekto ng tagtuyot sa loob ng apat na dekada.

Halos 68-milyong katao ang apektado ng El Niño na nagresulta ng tagtuyot at kawalan ng ani sa Southern Africa.

Ayon kay Tinashe Farawo, Zimbabwe Parks and Wildlife Authority (Zimparks) spokesperson, ang karne ng elepante ay nakatakdang ipapamahagi sa komunidad ng Zimbabwe na apektado ng naturang phenomenon.

Ang pagkatay sa mga elepante ang magiging kauna-unahan sa bansang Zimbabwe magmula noong 1988 na gagawin sa mga distrito ng Hwange, Mbire, Tsholotsho at Chiredzi.

Samantala, mahigit 200,000 mga elepante ang naninirahan sa isang conservation area na nakakalat sa limang bansa sa southern Africa - Zimbabwe, Zambia, Botswana, Angola at Namibia – kung saan ang rehiyong ito ang isa sa mga naging tahanan ng pinakamalaking populasyon ng elepante sa buong mundo.