HALOS 36 NA SIBILYAN, PATAY SA MISSILE ATTACK NG RUSSIA

Inulan ng missile attack ng Russia ang childrens’ hospital sa Kyiv, Ukraine nitong Lunes na ikinamatay ng humigit-kumulang 36 na mga indibidwal.

Makikita sa mga larawan ang mga magulang na umiiyak habang hawak-hawak ang kanilang sanggol na naglalakad sa kalye sa labas ng ospital matapos ang pambihirang pag-atake mula sa himpapawid.

Ayon sa ulat, nasa 50 civilian buildings kabilang na ang mga residential houses, business center at dalawang medical facilities ang nasira sa Kyiv dahil sa ginawang missile attack ng Russia.

Kaugnay nito, daan-daang residente sa Kyiv ang nagtulong-tulong sa rescue operation, pagbibigay ng relief goods, medical assistance gayundin sa pag-alis ng mga naiwang debris ng pagsabog.

Nagpahayag naman ang pamahalaan ng Ukraine ng araw ng pagluluksa ngayong araw ng Martes, Hulyo 9, para sa isang pinakamatinding air attacks ng gyera.

Samantala, mariin namang itinanggi ng Moscow ang pag-target sa mga civilian at civilian infrastructure kahit na libo-libo ang naitalang namatay magmula ng ilunsad ang kanilang pag-atake.