19 SUGATAN SA PAGSABOG NG ISANG FIREWORKS DISPOSAL SA ZAMBOANGA CITY

Sugatan ang 19 na tauhan ng iba’t ibang ahensya ng gobyerno mula sa nangyaring malakas na pagsabog ng isang fireworks disposal sa Brgy. Cabatangan, Zamboanga City nitong Lunes.

Sa ulat ng Philippine Emergency Alerts, nagsagawa ng fireworks disposal sa lugar sa pangunguna ng Regional Explosive and Canine Unit 9 nang magresulta ito sa premature detonation na siyang dahilan ng pagkasugat ng 19 na miyembro ng iba’t ibang government agencies.

Sa kabuuang 19 na sugatan, 6 rito ang mga pulis, 3 ang mula sa Philippine Coast Guard (PCG), 5 ang bumbero, at 5 ang sundalo.

Kaugnay nito, naramdaman din sa Zamboanga International Airport ang pagsabog kung saan nagkaroon ng minor damage sa check-in counter.

Ngunit sa kabila nito ay tuloy pa rin ang operasyon ng naturang paliparan.

Samantala, binuksan naman ng PNP ang imbestigasyon ukol sa nangyaring insidente.